Watin u gas to know about how woman suppose propose to man

 Watin de dis tori na di imside and outside, up and bottom of watin u gas to know about how woman fit propose to man for marriage.

Dis matter tie better knot for head oo! But na small small we go de loose am. So relax and enjoy dis tori way sure. 

Any time and anywhere way dem de talk di matter of weda woman suppose to propose to man, na so pipul de talk different different tins oo! Plenty pipul de against am oo! Na only small number of people way de support am. Many pipul way support am na women, e shock u? Other pipul way de support am na some pipul way go skull come study law and other matter way concern human right. 

Before we put geer ontop dis tori, make we first talk about weda woman suppose to propose to man or she no suppose do am at all at all.

One tin way u gas to know first be say, we don stop to de do plenty tins way we been de do before. Dis tins dem way we come stop de do na some tins way our great great grandpapa dem teach us say dem de right. Why we stop de do dis tins? Pipul way sabi don touchlight di matter come see say we no need dis tins, infact some of dos tins dem de come cause plenty wahala for pipul. Some of dis tins we we stop to do na: to de kill twins, to de circumcise girl piken, papa and mama to marry wife give dia piken wen in still de small, papa and mama to de make sure say dia first daughter marry before di on ones way follow bodi go marry. We gas to stop all dis tins onto say dem no make brain, dem don cause plenty problem even tear some family scatter, and plenty pipul don die because of all dis tins.

So watin be di point? We no stop all dis tins dinsame time, na small small in take de end. And even as e be so, oda tins still de way we gas to stop. For di matter way de we table now, I don go check check ooo, come see say di na di tradition of our great great papa dem make only man de propose, wen woman come gada moran do am, dem go see her as pesin way no get respect, way no de shame and say she don comit abomination. Den fit even chase am comot for house. Now u don see wia di believe say woman no suppose propose to man come from. Now we don get sence pass before di time way our great papa dem still de learn (oyimbo pipul call am explore) watin good and watin bad, di way we de behave don change, and so, di way we de think too suppose change.

Think am like dis. Man de see watin in like for market buy and woman qua de see de buy. We fit talk say as na woman pesin must to de buy anytin way in feel say she go like? U no say in no make sense and na wickedness be dat. Na still di same tin oo, if woman don like one man way de totori am for mind dem come tell am say she no go fit marry dat man unless say di man come propose to her. In no make sense, na still wickedness be dat. So make we de see good call am good, see bad call am bad and give everybodi right way reach dem no matter say dem be man or woman, poor or rich. Dis one go help us well well for we society.

Dis one way we don torchlight show say woman get di right to fit propose to man.

Now, di matter come be, how dem go carry do am?

U no say for family na man be di head, so dat one mean say woman suppose de pour respect ontop di man, na so in still be for dis matter. If u be woman, and u don like one guy way una be friend, and u don see say di man never de do like say him want come propose to u, u fit do am. But before u do am try dis tins way I want talk.

1. Try do everything way go show am clear say u really love and respect am.

2. Try know plenty tins about am - like in family pipul, in character, tins way in like and tins way in hate.

3. Try de help in life - u fit join hand solve some wahala way in get or de five am good advice.

When u don de do all dis tins for some time and him no still come propose to you. U fit go ahead, in fit be say him de sham to do am or in want make ona still be friend and in no want come do something way fit end ona friendship. So wen u come gather moran do am, him go like am well well. But what if after u don do everything way u suppose do come propose to am and in come talk no. U no go kill urself, just leave, no feel shame. De proud of urself as pesin way no use because of shame die in silent. For future u fit still get another man way go love u de way u love am.

If u get something way u wan add join dis tori, abeg write am keep for comment. U really do well as u read dis tiri way sure. Come back again next time for oda tori way u go like read way I still de cook come. Shout am make oda pipul hear wen u share am ontop ur social media.